Poem 1. Jiɛ̈ŋ literature from Jiɛ̈ŋ Institute of Education

“Aye rin kek kaa cï döŋ,”
“Aye rin kek kaa cï döŋ,
“Ku ran nɔŋ kee rinkë aliu,
Ku tɛ̈k acïn puɔ̈nden cï döŋ.”
“Aye rin kek kaa tem në wɔnhïïm,
“Aye rin kek kaa tem në wɔnhïïm, Ku të ëye täk kake,
ku të ëye luɔ̈i kake akënkuke muk në wɔnhïïm.”
“Aye rin kaa cï tem në wɔ nhïïm, ku na juir akököl në raan nɔŋ ke rinkë, ka cää ye yök.
“Akölë aca jäl tïŋ në ɣa nyin, aca tïŋ në nyuɔ̈th, acïn bɛ̈n në muɔ̈ɔ̈thic,
“Raan acol ku abäär, ku aɣɛr piɔ̈u, arir ku anɔŋ piɔ̈u.”

Jäl thiëëc “ya yïn yeŋa?” Go ɣa yɔ̈ɔ̈k, “ye ke ɣɛn raan yeku gɔ̈ɔ̈r aköl-aköl, ɣɛn Muɔnjäŋ.”
“Ee ɣɛn Muɔnyjäŋ ce wec në raande.”
“Ee ɣɛn Muɔnyjäŋ ce kɔ̈ɔ̈c ku dɛɛi në kë nɛ̈k raande.”
“Ee ɣɛn Muɔnyjäŋ ce aduɔ̈k ye tääu ë ye nhom ye tök ku mɛ̈ɛ̈r nhom ë raande.”
“Ee ɣɛn Muɔnyjäŋ kuc tiɛɛl,”
“Ee ɣɛn Muɔnyjäŋ nhiɛɛr raan ëbɛ̈n, të cɔk ɣɛn jäl ba  riaar(keny) lɔ̈ŋdɛ̈, ke ɣɛn lor nhom në ciɛɛu.”
“Ee ɣɛn Muɔnyjäŋ nhiar në akëëth.”
“Ee ɣɛn Muɔnyjäŋ na kääc mandhara nyïn, ke akendiɛ̈ yennëka kan tïŋ.”
“Ee ɣɛn Muɔnyjäŋ ye wɛ̈t ke wun piɛ̈k ye nhom tueŋ bë ke ya tïŋ.”
“Ee ɣɛn Muɔnyjäŋ na piɛŋ ke nɔŋ kë cï mäthdiɛ̈ yök, ke ɣɛn jiɛ̈l ba riaar ba lɔ tïŋ.”
“Ee ɣɛn Muɔnyjäŋ cï riäŋ de piny kë riɛ̈ɛ̈c rac në yecin ëbɛ̈n, acïn mɛnh töŋ ye ɣa piŋ.”
“Ee ɣɛn Muɔnyjäŋ nɔŋ Agaar, ku ɣɛn nɔŋ Gɔ̈k ku  nɔŋ ku Twïc, Malual, renk, ku ɣɛn nɔŋ Muɔnyjäŋ kɔ̈k ëbɛ̈n.”

“Ku ka cïn mɛnh töŋ cï ɣa caal piɔ̈u në kek yic ëbɛ̈n.”
“Acïn mɛnh töŋ cï rinciɛ̈ muk.”
“Acïn mɛnh töŋ cï ye piɔ̈u tɔɔŋ në kek yic, ku jiɛm, ɣɛn kee Muɔnyjäŋ ciɛlic.”
“Acïn mɛnh töŋ cï ye piɔ̈u tɔɔŋ ku jiɛm, ɣɛn bë dhuk në ceŋ Muɔnyjäŋ ciɛlic, aya tak acïn Muɔnyjäŋ ciɛlic.”
“Acïn Muɔnyjäŋ ciɛlic ye lɔ tɛ̈c ɣöt, ku mɛ̈ɛ̈r nhom në wën wut baai-ciɛlic.”
“Acïn Muɔnyjäŋ ciɛlic ye wën wun gɛ̈m pïu wɛ̈r-thok, ku yen lɔ dek në wɛ̈ɛ̈r ciɛlic.”
“Acïn Muɔnyjäŋ ciɛlic ye nhïïm määr Thoŋ Muɔnyjäŋ ciɛlic.”
“Acïn Muɔnyjäŋ ciɛlic yee nhïïm määr ceŋ Muɔnyjäŋ ciɛlic.”
“Aŋuɔt ke ba lɔ kɔɔr yen Muɔnyjäŋ ciɛlic, ku ka ce mɛɛn.”
“Mɛɛn! ba kë thiin koor(nyɔɔt) lueel mɛɛn ka luel, yïn ye ŋa mɛɛn? ŋö kɔr(wïc) ëmɛɛn? Aba tïŋ yïn nyin ëmɛɛn? Yennë ee Muɔnyjäŋ ë mɛɛn.”

“Ku Muɔnyjäŋ thɛɛr aa Muɔnyjäŋ ke cin mat ku bïk pïïr, ë pïïr athɛɛr.”
“Aa Muɔnyjäŋ  ye röt dak”
“Aa Muɔnyjäŋ  ye röt thiëëc.”
“Aa Muɔnyjäŋ  ye röt ŋäŋ(tak).”
“Aa Muɔnyjäŋ  ye röt kony”
Acïk lueel Thoŋ Muɔnyjäŋ ciɛlic,
“Wuɔ Muɔnyjäŋ emɛɛn, wuɔ Muɔnyjäŋ cïn kony,”
“Wuɔ ye Muɔnyjäŋ ye ŋɛk ke mɛnh man tïŋ ke yuiɛ̈ɛ̈k  në ye nhom tueŋ, ku cï kɔn kony.”
“Ku jɔl???? ----kääckë ra, ee Yïror kek kë Tony, ye Tony yennë dhiɛ̈th we thïn?”
Cït ye junub töŋë yennë dhiɛ̈th week thïn?

“Amuɔ̈kkɛ̈ yen tiɛɛl, ku kuɔ̈c ciɛɛŋ ku ka bäk tïŋ kë bï mïthkuɔ̈n lɔ thïn!”
“Yïn cï ber keny Gɔ̈ɔ̈k, ku ba lɔ yök thïn!”
“Yïn cï ber riɛɛr(keny) Renk, ku ba lɔ yök thïn!”
“Yïn cï ber keny Twïc, ku ba lɔ yök thïn!”
“Yeŋö ba lɔ yök thin? ku aa mïth ke maa të kën pïïr ye yic waar?”

“Muɔnyjäŋ nyiɛc! të cɔk pïïr ye yic waar në ŋö, ka cï kɔn ye piɔ̈u waar.”
“Muɔnyjäŋ nyiɛc! na ciɛɛŋ ke ye yic waar-- ka cï piɔ̈u kɔn yiɛc,”
“Muɔnyjäŋ nyiɛc! aa Muɔnyjäŋ ye röth door, aa Muɔnyjäŋ na tïŋkɛ̈ yïn nhom roor kaa kony bïk yïn loor.”
“Ye kek jɔl röt rac!”
“Ye kek jɔl ya karoor!”
“Ye kek cï röt jäl thiäi roor!”
“Aŋuɛ̈ɛ̈n ba jäl, ba ɣa nhom piɛɛr roor, ku ba lɔ ceŋ të liu Muɔnyjäŋ thïn.”

“Ɣɔn thɛɛr, ɣɛn e ce piɔ̈u miɛt ku ɣɛn e ce ɣakɔ̈u ye gɛi në të liiuë Muɔnyjäŋ thïn”
“Ë mɛɛn, ɣɛn ye gɔ̈ny-kɔ̈u ku luel amäth tïŋ kennë!”
“Kään ee Muɔnyjäŋdɛ̈t,
Kennë(Kään) Muɔnyjäŋdɛ̈ loi thok.”
“Kennë(Kään) ee Muɔnyjäŋ ye yïn gɔ̈t thok,”
“Kään ee Muɔnyjäŋ ye yïn tiit thok në wɛ̈t thiin rɛɛc ba lueel bennë yïn mac thok.
“Ke yïn jɔl ya riäŋ mac thok,
Ku we jɔl ya riäŋ mac thok.”
“Ɣɛn cï jäl gäi Muɔnyjäŋ”