Muɔny ariäu ku Kee tic ëyadɛ̈ .
Ee moc yennëkee tɔ̈ ɣɔn, ku yen e cï jäl thïïk. Na ɣɔn ke jɔl tɔ̈ ke tiŋde baai. Ku yen ee mony ye tic. Moc, yennëkee kë bë cam baai yennëke ye lueel, na ye cɔɔŋ (akup, kora) tök ka cɔŋ (akuup, koraai) keerou ke bë keek cam baai, keka lɛ̈k tiŋde, ku gɛm tik ye ɣoou, ku looi ëya.
Na ɣɔn në kööl tök, ke bul ee jäl tɔɔu, ɣɔn në gɛ̈ɛ̈ŋ-akɔ̈l, bul ye cɔɔl athanywoŋkɔ̈u, yen ee bul ye dieer thëëi ke akɔ̈l ŋuɔt ke ruer thok. Go moc jäl tɔu në bul ku mɛ̈ɛ̈rnhom në kë lɔ̈k cäp (thaal) baai. Na ye yïnya, ke dhiɔmde lɔ cel, lök baai löökic ke liu. Yen acï jäl mat në muɔɔŋ (gɔ̈k) kennë nyande ëtɛ̈ɛ̈n. Nawën ke ye nyande tïŋ ke cïn many cï took ku nyande arɛ̈ɛ̈r ke ye, ku akɔ̈l akɔr bë cuɔl. Go thiëc, ye yeŋö cï piny ya coolol? Cïn kë cam mɛnhdiɛ̈? Go nyande bɛ̈ɛ̈r, ye kaa cie yen! Mama, wun ë këtɔ̈i (ŋɛk) aliu, akën kë bë thaal lueel wën jiɛ̈l en. Go dhiɔm gua ye “ca bul dieer abë rem kɔ̈ɔ̈c cï kaa kääc jiɛɛu! cï ŋö! Ye moc yennë ye tic baai?” ɣoou! ɣɛn bɔ̈ ɣɔ̈! ku lööny dhöl leer buul. Kana ye ɣeet në bul-kɔ̈u, ke yök bul ke cï dɔm a kee cït “acaak ke neer” ku mony de nyande ee tuur ŋoon buul adier nya yetök. Na kɔɔr bë miɛt ciɛ̈n bë lɔ luɔ̈m yïc kë cïï rɔt lëu, riɔ̈ɔ̈c guɔ̈p. Go rɔt kɛ̈m piny në mony de nyande lɔ̈ɔ̈m, ku ye dit yen ciɛk, tɛ̈ɛ̈u lueel:
yelɛ̈ piɛŋkë waarde ëkë;

Dhiɔp: “Monyë nyandiɛ̈, akɔ̈l acï cuɔl? kädiäŋ ke mɛnhdu bë ke nyiin ka guärke? (Ku yen moc ee muɔny ariäu, go wɛ̈t guɔ nyic yic). Ku ber dhuɔ̈k piny;
Dhiɔp: “Monyë nyandiɛ̈, akɔ̈l acï cuɔl? kädiäŋ ke mɛnhdu bë ke nyiin ka guärke?"
Mony ë nya: Go bɛ̈ɛ̈r; lueel, lɔɔr lɔ guärke mathiäŋ-dul ee lɛ̈i weer, këdït ca lɛ̈i weer, tueny dhoor ë nyum yic, kë cam aber gääi, dhoordït de kulaŋ, lɛ̈i lɔ weer ë pïrïït maköpo.”
Dhiɔp: (Go dhiɔm ŋuɔt ke dhuk piny, ye) “Monyë nyandiɛ̈, akɔ̈l acï cuɔl? kädiäŋ ke mɛnhdu bë ke nyiin ka guärke?"
Mony ë nya: (Go mony de nyan ŋua ye) “yiɛɛc magɛ̈ŋdiɛ̈! Maa në yïn cie dhiɔp! Ke yïn ee ca lɛ̈k wɛ̈t ë wën, lɔr ku löm abuɔ̈nydïtë ku köpic, wer-wer manyiɛ̈ɛ̈l köpic, wer-wer manyiɛ̈ɛ̈l jeric.”
Go bul jäl dɔm ëtɛ̈ɛ̈n ku jɔl kɔc daai në keek, në kë cï keek liɛ buul. Go ŋuɔt ke dhuk piny ago cuɔ̈k nyic, ku bë rɔt jäl kual.
Dhiɔp: “Monyë nyandiɛ̈, akɔ̈l acï cuɔl? kädiäŋ ke mɛnhdu bë ke nyiin ka guärke?
Mony ë nya: “yiɛɛc magɛ̈ŋdiɛ̈! Maa në yïn cie dhiɔp! Ke yïn ee ca lɛ̈k wɛ̈t ë wën, lɔr ku löm abuɔ̈nydïtë ku köpic, wer-wer manyiɛ̈ɛ̈l köpic, wer-wer manyiɛ̈ɛ̈ jeric.”
Mony ë nya: “Werë-wer manyiɛ̈l! Wer-wer manyɛ̈iɛ̈l! köpic” lɔɔr ku löm abuɔ̈nydïtë ku köpic, wer-wer manyiɛ̈ɛ̈l köpic, wer-wer manyiɛ̈ɛ̈l jeric.”
Go bul jäl dɔm ëtɛ̈ɛ̈n ku jɔl kɔc daai në keek, në kë cï keek liɛk buul. Nawën ke bul jɔl riir ku jɔl nyïïr lɔ wɛ̈ɛ̈rnhïïm, go rɔt jäl liip ëtɛ̈ɛ̈n leer baai. Na ye ɣeet baai, ke yök nyande, go yɔ̈ɔ̈k ye jɔt cäpë töny ke cï monydu lueel ëkë. Go nyande rɔt jɔt ku ciɛ̈p töny.