Wëlpiɛth ke Jɔɔn cïthieei: Jɔɔn 1:1-18

1 Në gɔ̈c gɔcë käŋ ke Wɛ̈t ee tɔ̈, ku Wɛ̈t ee tɔ̈ ke Nhialic, ku Wɛ̈t ee ye Nhialic. 2 Yenekee tɔ̈ kennë Nhialic në gɔ̈c gɔcë käŋ. 3 Yennëkee cak käŋ kedhia: ku të cennë yen, e ke të cïn kë cï cak në ka cï ke cak. 4 Pïïr e tɔ̈ në ëyic; ku pïïr yennëka ye ɣɛɛr de raan. 5 Ku ɣɛɛr ee ya ruɛɛr tëcol, ku kacï cuɔl ye piŋ. 6 Raan e tuɔ̈ɔ̈c në Nhialic, raan cɔl Jɔɔn. 7 Yennëkee dulëk, bï kɔc ya lɛ̈k ɣɛɛr, bï kɔc kedhia bïk ya gam në yen. 8 Ku kacie yen e ye ɣɛɛrë, ee bɔ̈ bï kɔc bï ya lɛ̈k ɣɛɛrë. 9 Yennëke ɣɛɛr yic, ɣɛɛr ye raan meer ëbɛ̈n, ran ye bɛ̈n në piny nom. 10 Ee tɔ̈ në piny nom, ku yennëkee cak piny, ku kakuc piny. 11 Ee bɔ̈ ënɔŋ kɔcke, go kɔcke cuɔ̈k lor. 12 Kɔc kedhia ye yen loor, ayeke yiɛ̈n riɛɛr bïk ya wɛ̈ɛ̈t ke Nhialic, kek kɔc ye rinke gam: 13 kɔc eke cïke dhiëth në riɛm, ku në piɔ̈n de rïïŋ, ku në piɔ̈n de raan, ake dhiëth në Nhialic. 14 Go Wɛ̈t ya rïŋ, ku ceŋ në wɔyic (goku nuɔɔmde ŋëm, nuɔɔm de Wäntöŋ e bɔ̈bei ënɔŋ Wun), cï thiäŋ në athiɛɛi ku yic. 15 Jɔɔn ee ye dulëŋde, ku ye cööt, jiɛɛm, Ye yekënnë, yennëkee yan jam, Ya yen man bï ɣa kuany cök ee ye tɔ̈ tueŋ në anom: yennëkee tɔ̈ ɣɔn ŋuɔt an wei. 16 Ke cï ye thiɔ̈ŋ acuk lööm wɔdhia, ku athiɛɛi në athiɛɛi. 17 Löŋ ake cï yiɛ̈n Mothe, ku athiɛɛi ku yic kaa bɛ̈n kennë Yecu Kritho. 18 Acïn raan cï Nhialic kan ŋëm; Wäntöŋden e bɔ̈bei, tɔ̈ në Wun yɔu, yennëkee nyuth ë kɔc.