Jɔɔn 10:1-42(John 10:1-42) Bible Lesson
1 We ya yɔ̈ɔ̈k nëyic, Ya raan
cee lɔ në rɔŋ de thökic në rɔk thok ku yith thïn në dhöl dɛ̈ peei, e kee ruëëny
ku ye dupëc. 2 Ku raan ye lɔ thïn në rɔk thok, yennëkee ya abiök de thök. 3 Ayee
dutït liɛ̈p thok; ku kayee thök piŋ rör: ku cɔɔl thökke në rinken, ku leer ke
biyic. 4 Na cï thökke kedhiɛ laar biyic, e kaa yeke ŋɔ̈ɔ̈r, ku ye thök kuany cök:
aayekï nyic rör. 5 Ku kaacïi alei ye kuany cök, aaye kat në yen: aaye rör de
alei kuc. 6 Ye parabolë acïï Yecu lɛ̈k ke: gokï ka cï lɛ̈k ke cuɔ̈k muk. 7 Go
Yecu ke bɛɛr yɔ̈ɔ̈k, Ye we ya yɔ̈ɔ̈k nëyic, Ya ɣɛn ye thoŋ de thök. 8 Ke kedhiɛ
cï ŋɔ̈ɔ̈r ɣanom aaye ruëny ku yekɛ̈ dupëëc: ku kaacïï thök ke ye piŋ. 9 Ɣɛn ye
thok: na ye raan ye lɔ thïn në ɣɛn, e kabï luɔk, ku kabï ya lɔ thïn, ku bïï
bei, ku kabï të de nyuɛ̈th ya yök. 10 Ruëëny ee bɛ̈n, bï ya kual ku bï ya nɛ̈k,
ku bï ya riɔ̈ɔ̈k: ɣɛn ee bɔ̈ bïk naŋ pïïr, ku bïk ya kuɛth në yen. 11 Ɣɛn ye
abiök piɛth: ku abiök piɛth ee wëike gam në thök. 12 Ku raan e kuëiyë, ku cee
abiök, ku cee thökke, na yee baŋbaar ŋëm ke bɔ̈, e kee thök nyääŋ wei ku kɛt: e
kaadɔm baŋbaar ke, ku ye ke thiäi wei: 13 në kë yen raan e kuëiyë, ku cïï thök
ye ŋëm apiɛth. 14 Ɣɛn ye abiök piɛth, ku Ɣɛn ye kaciɛ̈ nyic, ku kaciɛ̈ aanyic ɣa,
15 cï man ye Awä ɣa nyic, ku Ɣɛn nyic Awä: ku Ɣɛn ye wëiciɛ̈ gaam në thök. 16 Ku
Ɣɛn nɔŋ thök kɔ̈k, cee thök ke ërɔŋë: aabake dhiɛ̈ɛ̈l bei ëya, ku kaabï ɣa ya
piŋ rör; ku kaabï ya biöŋ tök, ku abiök tök. 17 Yennëka ye Awä ɣa nhiaar, në kë
can wëiciɛ̈ gaam, ba ke bɛɛr lööm. 18 Acïn raan ye ke lööm ënɔŋ ɣa, aaya gam në
guɔ̈pdiɛ̈. Ɣɛn nɔŋ riɛɛr ban ye gaam, ku Ɣɛn nɔŋ riɛɛr ban en bɛɛr lööm. Ye löŋë
ee kap ënɔŋ Awä.
19 Go Judai bɛɛr teer në kee wëlkɛ̈.
20 Ku jam kɔc kɔ̈k, Ya kanɔŋ jɔŋ rac, ku kee miɔ̈l; yeŋö yakɛ̈ piɛ̈ŋ en? 21 Ke
lueel kɔ̈k, Yï kee wëlkɛ̈ aacee wël ke raan nɔŋ jɔŋ rac. Lëu jɔŋ rac cɔɔr a bï
yïn?
22 Ku miɛ̈th dït de gɛɛm ee tɔ̈ në Jeruthalem ɣɔn muɔ̈i; 23 go Yecu cath në yekaluic ger de Tholomon. 24 Go Judai guëër ënɔŋ en, ku yöökkï, Yï ba wɔ cɔk gɛ̈i naa? Na ye Kritho, ke lɛ̈kë wɔ ëjik. 25 Go Yecu dhuɔ̈k ke, Ye kaca lɛ̈k we, ku cäk gam: ka yaa ke looi në rin ke Awä keeka ye dulëëk ke ɣɛn. 26 Ku cäk gam, në kë cïï we ye thökciɛ̈. 27 Thökciɛ̈ aaye ɣa piŋ rör, ku kaa yake nyic, ku kaa ye ɣa kuany cök: 28 ku kaa yake yiɛ̈n pïïr athɛɛr; ku kaacï bï kan määr aa bïk lïu, ku kacïn raan bï ke wuɔ̈th bei në ɣacïn. 29 Awä, man e yïn ke ɣɛn, adït në kɔc kedhiɛ; ku kacïn raan lëu ke në wuth bei në Awa cïn. 30 Wɔ ye tök wɔnnë Awä. 31 Go Judai kur bɛɛr kuany, bïk kek ke ye biök. 32 Go Yecu dhuɔ̈k ke, Ye luɔɔi piɛth kuɔ̈tic aca nyuɔ̈th we në Awä; ye luɔɔi no de kee loikɛ̈ bïï we ɣa biök? 33 Go Judai dhuɔ̈k e, Yï yïn cuk biök në luɔɔi piɛth; ee lɛ̈ɛ̈t lɛ̈ɛ̈t yïn Nhialic; ku në kë yïn raan ye rɔt cɔk ye Nhialic. 34 Go Yecu dhuɔ̈k ke, Ye kënnë gɔ̈ɔ̈r në löŋduɔ̈nic, Yï kaca lueel, Ya we ye nhielic? 35 Na cï ke cɔɔl nhielic, kek kɔc cï wɛ̈t de Nhialic ke bɛ̈nkɛ̈ (ku kacïgɔ̈ɔ̈r acee lëu në duɔ̈ny), 36 ke we jam në yen, yen man cïï Wun thieei, ku tuuc në piny nom, Wuɔ̈ yïn lat Nhialic; në kë yan jam, Ya ɣɛn ye Wën de Nhialic? 37 Na cää luɔɔi de Awä ye looi, ke we duɔ̈kɛ̈ Ɣɛn ye gam. 38 Ku na ya luui, ku cäk ɣa cak gam, ke we yakɛ̈ luɔɔi gam: bäk ya nyic, ku bäk ya gam, lan ye Awä tɔ̈ në ɣayic, ku ɣɛn në yeyic. 39 Gokï bɛɛr kɔɔr bïk dɔm: go rɔt kual në kecin. 40 Ku ber lɔ në Jordan lɔŋtï, të yee Jɔn kɔc kan baptïth thïn; ku ye ceŋ thïn. 41 Go kɔc juëc ya bɛ̈n ënɔŋ yen; ku yekï jam, Yï kacïn këgɛ̈iyë e cïï Jɔn looi: ku wël kedhiɛ eke cï Jɔn ke lueel në ye raanë aaya yith. 42 Go kɔc juëc ya gam eetï.
