Genesis (Gɔ̈c) 1:1-31: The Beginning

Gɔ̈c ëgɔɔcë käŋ ëciɛkë Nhialic nhial ku piny. 2 ku cïn Pinynhom käŋ lɛ̈ɛ̈unhom; tɔ̈ cuɔl në pïunhïïm:ku ye Jɔŋdïït de Nhialic tëëk në piäunhon. 3 Go Nhialic jam, yennë ɣɛɛr tɔ̈; go ɣɛɛr tuɔ̈l. 4 Go Nhialic ɣɛɛr ŋëm në piɛth: ku tek ɣɛɛric në cuɔl. 5 ku cɔk Nhialic ɣɛɛr ye Akɔ̈l, ku cɔk cuɔl ye Wɛ̈ɛ̈r. ku thëi ke miäkduur aaye aköl tök.

6 Go Nhialic jam, yennë kaam tɔ̈ në piäuciɛlic, ku në tek pïu. 7 Go Nhialic kaam cak,ku tek pïukɛ̈ në kaam baŋ nhial , ku pïukɛ̈ në kaam baŋ piiny: go tɔ̈ yeya. 8 Ku cɔk Nhialic kaam ye Nhial. Ku thëi ke miäkduur aaye aköl keerou. 9 Go Nhialic jam, yennë piäu tɔ̈ në pinythar në mät në të tök, ku në të ɣer tul: go tɔ̈ yeya, 10 Ku cɔk Nhialic të ɣer ye Piny; ku cɔk män de piäu ye Baar: go Nhialic ŋëm në ye këpiɛth. 11 Go Nhialic jam, Yennë piny cil në noon, ku në wɛl ye luɔk në nyïïn, ku në tiim ye luɔk ka nɔŋ yiic nyïïn, ye luɔk në luɔkden, në Pinynhom: go tɔ̈ yeya.

12 Go piny cil në noon ku në wɛl ye luɔk në nyïïn, ye luɔk në luɔkden ku në tiim ye luɔk në ka nɔŋ yiic nyïïn, ye luɔk në luɔkden. Go Nhialic ŋëm në ye këpiɛth. 13 Ku thëi ke miäduur aaye aköl keediäk. 14 Go Nhialic jam, Yennë kaɣer tɔ̈ në kaam Nhial, bïk akɔ̈l tek ku wɛ̈ɛ̈r; ku në ke tɔ̈ bïk käŋ ya nyuɔɔth, bïk akɔ̈l ya tek ku run. 15 Ku në ke tɔ̈ bïk käŋ meer në kaam nhial bïk ya ruɛɛr në Pinynhom: go tɔ̈ yeya. 16 Go Nhialic kaɣeer dït keerou cak, bï kë ŋuän tɔ̈ akɔ̈l, ku bï kë koor tɔ̈ në wɛ̈ɛ̈r, ku kuel ëya. 17 Go Nhialic ke tääu në kaam nhial, bïk ruɛɛr në Pinynhom, 18 bïk naŋ riɛɛr në akɔ̈l ku wɛ̈ɛ̈r, ku bïk ɣɛɛr tek kennë cuɔl: go Nhialic ŋëm në ye këpiɛth. 19 Ku thëi ke miäkduur aaye aköl keeŋuan. 20 Go Nhialic jam, Yennë piäu Thiäŋ në kapïr, ku në diɛt cath nhial në Pinynhom në kaam nhial.

21 Go Nhialic kagök ke Baar cak, ku kapïr, Kedhia cath në pïu yiic në cit cäŋ ëciɛkë keek,ku diɛt nɔŋ wuɔ̈k në cït cäŋ ëciɛkë keek, go ŋëm në ye këpiɛth.

22 Go Nhialic ke theei, jiɛɛm, Ye we bï mïthkuɔ̈n dhiëëth ke ke juiëc, ku we bï kut, ku thiäŋkɛ̈ piäu de baar, ku në diɛt kuɔ̈t ëya në Pinynhom. 23 Ku thëi ke miäkduur aaye aköl keedhiëc.

24 Go Nhialic jam, Yennë piny dhiëth kapïr në cït cäŋ ëciɛkë keek, yï ɣɔ̈k ku kamol piiny ku läi ke Pinynhom në cït cäŋ ëciɛkë keek: go tɔ̈ yeya. 25 Go Nhialic läi ke Pinynhom cak në cït cäŋ ëciɛkë keek: Go Nhialic ŋëm në ye këpiɛth,

26 Go Nhialic jam, ye cakku raan ke thöŋku röth: ku në nɔŋ riɛɛr në rec bɛɛr, ku diɛt nhial, ku ɣɔ̈k,ku Pinynhom ëbɛ̈n, ku kamol Kedhia në Pinynhom. 27 Go Nhialic raan cak ke thɔ̈ŋ rɔt, ciɛk Nhialic ke ye kɛ̈ɛ̈rëde: yï moc ku tik kekka ke ciɛkke. 28 Go Nhialic ke theei,ku yöökke,  Ye we bï mïthkuɔ̈n  dhiëëth ke ke juiëc, ku we bï kut, ku thiäŋkɛ Pinynhom, ciɛ̈ŋkë në riɛɛrduɔ̈n në Pinynhom ku naŋkë riɛɛr në rec bɛɛr, ku diɛt nhial, ku kapïr Kedhia cath në tiɔpnhom.

29 Go Nhialic jam,Ye ŋɛ̈mkɛ̈, we ca yiɛ̈n wal Kedhia ye luɔk në nyïïn tɔ̈ në Pinynhom ëbɛ̈n, ku tiim Kedhia ye luɔk në k nɔŋ yiic nyïïn, aabï tɔ̈, aabï ya ya mïïthkuɔ̈n: 30 Ku wäl ŋök ëbɛ̈n ee miɛ̈th de läi ke Pinynhom Kedhia, ku diɛt nhial Kedhia, ku kamol Kedhia, në Pinynhom nɔŋ yiic wëi: go tɔ̈ yeya. 31 Go Nhialic ka cïke cak Kedhia ŋëm, ke ke ye kapiɛth arët. Ku thëi ke miäkduur aaye aköl keedhetem.

Genesis (Gɔ̈c) 2:15-17; 3:1-7

15 Go Nhialic Yekoba go moc laar, ku tɛ̈ɛ̈u dom de Eden bï ya puur ku tiit.

16 Go Nhialic moc yɔ̈ɔ̈k, ye yïn bï ya cam në tiim ke dom kedhia tëcïn kë pën yïn,

17 ku tim de nyïc, de nyïny piath ku rɛ̈ɛ̈c, acïï bï cam:kööl ciɛm yïn en, ke yïn thou nëyic.

3: 1-7 ku këroor ee nyic dhuɔ̈m në läi roor kedhia cï Nhialic Yekoba ke cak. Go tik thïc,ye jam Nhialic, ye cäk tiim ke dom bï ya cam kedhia?

2 Go tik këoor yɔ̈ɔ̈k,Ye luɔk de tiim ke dom aalëukuke në cäm:

3 ku luɔk de tim tɔ̈ në dom ciɛlic, yennëka cï Nhialic lueel, Ye kacäk bï ya cam,ku cak jak, duɔ̈k ke we bï thou.

4 Go këroor tik yɔ̈ɔ̈k, Ye we cïï thou ëcök;

5 anyic Nhialic lan na camkɛ̈ ye, ke we bï wenyïin liep në kööl ciɛm we ye, ku bäk ciɛ̈t Nhialic, bäk piath ku rɛ̈ɛ̈c nyic.

6 Ana ye tik ye ŋëm tim në piɛth në cäm, ku piɛth në kɔc nyïïn,ku kɔɔr në yepiɔ̈u bï ye cɔk nyic käŋ, ke löm nyinde , ku ciɛm; ku yïn monydeen tɔ̈ ke ye; go cam ëya.

7 Go nyïinken röth liep, ku nyickɛ̈ lan tɔ̈ keek në kecin; gokï apäm de ŋaap cuëëc, ku cɔkkï ye biɔɔŋ.